Aye Carumba

 papansin si Nezelle at hinarangan si Marge

Dahil malapit na ang pasukan ay naisipan kong gumawa ng entry na pambata. Puwede na rin ito sa mga isip-bata tulad namin ni Taympers na si Noynoy, este Homer pala,  ang layout / template ng blog.

Matino ba ang pamilya mo?

Siyempre sa walang kakuwenta-kuwenta kong intro, obvious na title,  at picture sa itaas na kuha sa Market! Market! ay alam mo na ang laman ng entry na ito -  ang pinakasikat na pamilya galing Springfield, THE SIMPSONS. Ang utak na gumawa sa kanila ay pag-aari ni Matt Groening, isang American cartoonist, screenwriter, at producer na siya ring gumawa sa Futurama. Kung nagustuhan mo ang mga pelikulang "Big", "As Good As It Gets", at "Jerry Maguire" ay 'di ka na siguro magugulat kung sasabihin ko ngayon na ang producer ng The Simpsons at ng tatlo sa peyborit kong movies ay walang iba kundi si James L. Brooks. May "connect" sila kaya nga quality ang mga ito.

Unang nakilala ang pamilya nila Homer, Marge, Bart, Lisa, at Maggie sa "The Tracy Ullman Show" (April 19, 1987) as animated shorts na tumatagal ng isang minuto. After three seasons ay nalipat ito sa Fox Broadcasting Company at nag-debut on December 17, 1989 as a half-hour prime time show. Okay, hindi ko idi-detalye ang history nila dahil magiging nobela ang tungkol sa 464 episodes na nagawa nila sa loob ng twenty-one seasons na kakatapos lang last May 23. Baka ma-obvious rin na nakikipagtsismisan ako during working hours kay pareng Wiki.


Salamat nalang at nasa early thirties na ako dahil kung bata pa ako ngayon ay siguradong na-miss ko ang mga napakagandang episodes ng cartoon na ito. Parang nasa ten years old ako nang una ko silang mapanood sa teevee. Medyo sikat pa ang RPN 9 that time at noong minsang nanonood ako ay naintriga ako sa commercial nila na ipinapakita ang mga groups na sumisigaw ng "We love the Simpsons!". Sa totoy kong edad noon ay na-excite ako nang biglang bumulaga ang opening scene ng show na tinutukoy nila. Wow, cartoons! Eh die-hard fan ako ng klasik Warner Bros. animations nila Bug Bunny na ipinapalabas naman ng paulit-ulit tuwing hapon sa IBC13. Siyempre, inabangan ko ang show at simula noon ay naging masugid na tagasubaybay na ako kasama ang utol kong si Pot. Kung sa entry ko tungkol kina Beavis and Butt-Head ay nagagalit si ermats dahil sa cool na kabobohan, ibahin mo ito dahil naging fan ang mga magulang ko ng show na ito.

Opening Sequence -  depende sa haba ng story na ipapalabas. Kapag mahaba ay 'di nila ipapakita ang buong opening kundi doon kaagad sa part na magpa-park na si Homer sa garahe nila. Kapag ipinakita naman ng buo ay inaabanagan ko ang bagong sinusulat ni Bart sa blackboard, 'yung bagong tono ng saxophone solo ni Lisa, at siyempre ang "couch gag" na palaging hinihintay ng mga viewers. Pinakagusto kong gag na ginawa nila ay 'yung "evolution of human race" na mula isda hanggang maging si Homer. Isa pa ay 'yung ginaya nila ang opening scene ng "The Flintstones". Panalo rin 'yung nabuhay 'yung couch at iniwanan sila!

Hindi ko na matandaan ang una kong napanood na episode pero nakatatak pa rin sa isip ko ang mga peyborit ko. Una ay ang "Simpsons Roasting on an Open Fire" na isang Christmas Special. Talaga namang na-touch kami nila mama, papa, at utol noong napanood namin ito. Nagpa-tattoo kasi si Bart at nalaman ni Marge kaya pinabura niya through laser surgery. Kahit na medyo mahal 'yun ay ginawa niya pa rin dahil alam naman niyang may bonus na makukuha si Homer galing kay Mr. Burns. Ang siste, $13 lang'yung nakuha ng asawa niya. Sa lungkot ni Homer ay pumunta sila sa Dog Race at napililitan siyang pumusta. Sa kasamaang palad ay natalo pa 'yung dapat ay pang Noche Buena nila. Paglabas nila sa karerahan ay nakita nila 'yung greyhound na pinustahan nila. Itinapon na siya ng amo niya kaya kinuha nalang siya ni Homer. In the end ay happy silang pamilya kahit na wala silang pagkain on Christmas Eve - may aso naman sila na mailuluto (patawa lang). Dito nakilala si "Santa's Little Helper" na ka-buddy ni "Snowball V" na isa namang pusa. Nagyon ko lang nalaman (as in kanina lang) na ito pala ang first episode shown on Fox. Kaya siguro ganun nalang katindi ang impact nito sa aming mag-anak. Bukod sa episode na ito ay paborito ko rin ang "Flaming Moe's" kung saan nasukat ang friendship nina Homer at Moe dahil sa naimbento nilang inumin. Ang "Krusty Gets Busted" na naging dahilan para maging mortal na kaaway ni Sideshow Bob si Bartholomew. Lahat ng mga sumunod na episode between the two of them are also my personal faves. Panalo din ang "Lisa's First Word", "Bart Gets Famous", at ang "Homerpalooza". Majority ng mga gusto ko ay from the seasons during the nineties decade pero sa totoo lang ay gusto ko lahat.

Kung merong "Captain Caveman" ang "The Flintstones" ay meron ding "The Itchy and Scratchy Show" ang The Simpsons. Isa itong "show within a show" na parang "Tom and Jerry" ang dating pero violent. Laging patay sa show si Scratchy (parang South Park lang), 'yung pusa.

Isa sa mga pinasikat din ng show ang mga appearances ng mga sikat na celebrities sa kanilang mga episodes. Siyempre bilang isang rocker, paborito ko ang mga episodes na nakita ang Red Hot Chili Peppers, Smashing Pumpkins, Sonic Youth, Cypress Hill, U2, Green Day, Fall Out Boy, at marami pang ibang banda. Magugulat ka nalang na kasama sa episode si Tony Bennett. O kaya si George Bush Sr., Linda at Paul McCartney , at Mike Judge. Sa ngayon, ang show na ito ang record holder ng pinakamaraming guest stars in a television series.

Naging part ng pop culture ang pamilyang ito lalo na noong Dekada No Benta. Tandang-tanda ko pa 'yung paborito kong mug ng tito ko na may picture ni Bart at may nakasulat na "Damn if you do, damn if you don't". Sa lahat ng characters ay si Bart ang pinakasumikat dahil sa kanyang notoriety. Maraming t-shirts dati na may design ng pagpapakita niya ng puwet. Sa kanya rin nauso ang catch phrase na "I didn't do it" at ito ngang tile ng entry ko na "Aye Carumba". Alam mo ba na euphemism ang salitang carumba ng etits? Si Homer naman ay kilala sa kanyang "D'oh" na tinanggap na sa English dictionary. Nagkaroon din ng isang music album ang pamilya kung saan ang first single ay "Do the Bartman" na sinulat pa ni King of Pop Michael Jackson! Sa Video games naman ay naadik ako at ang pinsan kong si Badds dati sa paglalaro sa Arcade ng game na "Konami's The Simpsons".

Kahit na dalawang dekada na ang lumipas ay hindi sila tumatanda literally. Kaya nga cartoons ang tawag sa kanila. Hanggang ngayon ay apat pa rin ang kanilang daliri. Hindi rin sila nagpapalit ng damit (well, may times na nagpapalit rin depende sa okasyon). Ang mga episodes nila ay nag-aadapt din sa changing generation. May ipod na sila, HDTV, laptop, at kung anu-anong uso sa bawat panahon.

Sabi ng maraming critics ay nawala na ang golden ers ng series after the ninth season. Nawawalan na raw kasi ng creative writing ang mga sumunod pagkatapos n'un. Kahit na anong sabihin ng mga paksyet ay hindi magbabago ang pagkahilig ko sa "Longest Running American Sitcom". Hangga't nandiyan sila ay patuloy akong manonood at tatawa sa dysfunctional family na representation ng bawat pamilya.