Kaming Mga Gamol

"Patingin-tingin, 'di naman makabili

Patingin-tingin, 'di makapanood ng sine

Walang ibang pera kundi pamasahe

Nakayanan ko lang, pambili ng dalawang yosi"

Sabi ng matatanda, magiging lakwatsero ka kapag may nunal ka sa paa. Tiningnan ko yung sa'kin, wala naman pero tumanda akong gala.

Lumaki ako sa Manggahan (Mango Ville para sa'ming magbabarkada) sa tapat ng Camp Crame. Kahit na sabihin mong kami ang napepersisyo kapag may mga kudeta, masarap sa lugar namin.Walking distance lang kasi kami sa Greenhills at sa Cubao. Kung matatag yung mga paa mong nangangati sa paggala, kaya mo ang two-kilometer walk!!

Bata pa lang ako, natuto na akong pumunta sa Greenhills. Nasa grade five yata ako nung una kaming maglakwatsa ng mga kabarkada ko sa elementary. May malapit kasing short cut sa public school namin.Delikado dumaan doon kasi creek siya na puno ng basura. Tatalon-talon ka sa mga bato para makatawid ka papuntang San Juan. Parang yung isang game sa Takeshi's Castle. Pag nagkamali ka, hulog ka sa creek na para sakin noon ay isang malaking kanal na puno ng tae. Sikat pa noon ang Greenhills kahit na bulok na ang Virra Mall at Shoppesville. Nawala yung shining era niya noong dekada nobenta pero sikat ito noong eighties, panahon ng Bagets. Yung tatay ko, malamang tambay din dito noong kabataan niya.

Kung Cubao naman ang pag-uusapan noong kabataan ko, mas gusto ko itong dayuhin kasi mas maraming puwedeng puntahan 'di tulad sa Greenhills. Meron kasi ditong mga sinehan tulad ng Quezon Theater, Act, Coronet, Sampaguita, at New Frontier. Nandito rin ang Superbranch ng National Bookstore. Ang Araneta Center. Lalo na ang mga malls - Ali Mall, SM, Plaza Fair, at Farmers Plaza kung saan may arcades na dahilan ng pagpunta naming mga bugoy.

Klasik itong mga lugar na ito sa'kin pero bigla silang nawala sa listahan naming magkakaberks noong may nagsulputang malls sa kahabaan ng Highway 54 early nineties.

ROBINSONS GALLERIA

Dito dati nakatirik ang "Payanig sa Pasig" na kung saan sikat na pasyalan kapag malapit na ang Pasko. Ito ang sinaunang Enchanted Kingdom. Kaso nawala rin ito noong pinagawan ni pareng Gokongwei ng mall na ayon sa tsismis ay may kulungan sa basement ng isang taong-ahas na suwerte daw sa kanila kaya yumaman.

Nasa Second Year Highschool na ako nang una kong marating ang paraiso na ito. Ang layo sa itsura ng Cubao at Greenhills. Tsaka mas malamig. Dito kami nagpapahangin kung mainit. After school hours sa St. John's Academy, isang sakay lang ito mula San Juan. Arcade na!! Laos na ang Family Computer that time, Street Fighter II na ang "in". Maraming Amusement centers doon -, sa taas, sa food court, at sa basement. Magsasawa ka. Time flies kahit na wala kang pambili ng P2.50 na token. Adik kami ng barkada kong sila Ryan Clemente at Noel Tugnao sa mga computer games.

Sa kainan naman, tatlo ang madalas naming tambayan. Ang LA Beef Bowl (Yoshinoya) na nagseserve ng Japanese Rice Toppings. Ang A&W Hamburger na sikat dahil sa root beer float. At siyempre, ang Burger King kung saan unlimited ang softdrinks. Astig dati kasi ikaw ang kukuha dun sa dispenser. Kahit na wala ka nang kinakain, tumambay ka lang doon kasi di nauubos ang inumin. Eh 'di nila kinaya ang mga Pinoy, ayun, nalugi. Tinanggal ang unli! Kasi naman, uuwi nalang, pupunuin pa yung lalagyan...

SM MEGAMALL

Kung nalakihan ako sa Galle, mas nagulat ako sa pinatayo ni Tito Henry. Sabi niya kasi sa'kin na tutal ay mahilig ako sa arcade, gagawa rin siya ng mall para mas may mapagpilian kami ng mga tropa ko.

1991, after a year na magbukas ang Robinsons ay nagpasikat ang team ni Uncle. Lintik sa haba ang pinagawa ng SM. Simula nang mapuntahan ko ito, naging favorite ko na siya sa lahat. Tinupad ni Tito yung mga arcade eh. Dun sa bridgeway sa basement, magkatapat yung dalawang amusent centers. Meron din doon sa fifth floor. Medto limot ko na yung mga pangalan pero doon sa baba, ang 'di ko malilimutan. Nahuli akong nagta-tamper ng video machine ng maangas na guard. Hinablot ako sa likod tapos binigyan ako ng isang hampas ng batuta. Na-high blood siya sa mga tokens ko na gawa sa pisong pinitpit!!

Noong nagbibinata na ako, mas naging memorable ang Gamol para sa akin. First date namin ng asawa ko ngayon ay dito nangyari. First movie - Halloween 4. Tapos kumain kami sa Tia Maria's sa fourth floor kung saan nagtatrabaho yung barkada naming si Ate Jen. Saksi ang mall na ito sa pang-MMK na love life namin.

Yung Skating Rink sa food court ang highlight ng Megamall. Masarap doon kasi malamig. Tapos puwede mong panoorin yung mga natutumba sa yelo. Sa second floor sa tapat ng Chowking, doon maganda ang view. Dito rin madalas ang eyeball ng mga na-adik sa Trunk Line...

EDSA SHANGRI-LA PLAZA

'Di nagpahuli si Robert Kuok, nagpagawa rin siya ng malaking mall malapit doon sa hotel nila. Medyo sosi ito noong wala pa yung bridgeway ng MRT. Ang daming artista na nagpupunta dito kasi medyo signature brands ang mga boutique.

Dito ko nakita sila Aiko at Carmina noong nag field trip kami sa Wax Museum sa itaas.

Sa Whimsy Land kami madalas ng mga barkada kong sila Mat, Nezelle, Bryan, Harry at Geline. Pag 'di mo trip maglaro ng Street Fighter, dito ka magpupunta para laruin yung games na may mapapanalunang tickets. Ito yung pambibili mo sa mga laruan dun sa strore nila. Lestse, kahit kelan 'di ako nakapagpalit dun kasi ang mahal ng equivalent points.

Nandito rin yung Quantum X na ilang beses namin hinanap pero di naman namin nasakyan.....


Masyadong mahaba ang kuwento ng buhay ko pagdating sa malls kasi paborito ko talagang gawin ang pagpunta dito. Kaya nga noong mapadpad ako dito sa Saudi, malls kaagad ang hinanap ko. Mas malalaki at malalamig ang nandito pero walang tatalo sa big three ko - GALLE, GAMOL, at SHANG!!