Manananggal ng Lakas

"Isa kang Batang Nineties kung naniwala kang nanganganak ang mga mababangong kisses at may taong-ahas sa Robinsons."

"Dito sa Saudi, nakakakalbo ang tubig...", narinig kong kuwento sa isang tumanda na dito.

Hindi ko alam kung mayroong may sapat na batayan pero minsan ay gusto ko nang maniwala sa tubig na nakakalagas ng buhok dahil kung papansinin mo nga ang mga retiradong galing dito, puro shaggy ang buhok... shagilid nalang!

"Hala ka, lalabas diyan 'yung kinain mo... Lalabas yung pari...Lalabas yung tren...", pananakot ng matatanda sa nasugatang bata.

Nakanamputs naman, saan ba nagmula ang pauso nating mga Pinoy na mayroong sugat na nagsusuka ng kanin?

URBAN LEGENDS - mga kuwentong pilit na pinapaniwalaan pero wala namang katotohanan. Sa madaling salita, tsismis lang na pambansang libangan nating mga Pinoy. Ang lufet ng imahinasyon ng mga ninuno natin para takutin tayo na kapag lumabas ng bahay ay may mumo o pulis na kukuha sa iyo. Kaya siguro "gullible" ang karamihan ay dahil pinalaki tayo sa kasinungalingan. Nakakatuwa nga namang tingnan ang  isang paslit na nanginginig habang pinapaiyak. Letsugas.

Noong Dekada NoBenta, maraming kumalat na kuwento na siya namang pinaniwalaan...

Ang Alamat ng Pregnant Kisses

Nasa grade five ako nang mauso ang air freshener na kung tawagin ay kisses. Maliliit na butil ito na parang munggo. Plastic at mabango. Kumalat sa lahat ng estudyante na kapag inalagaan mo nang mabuti, ito daw ay manganganak. 'Yun ang sabi ng tinderong may de-tulak na toy store sa labas ng eskuwelahan namin. Nag-alaga kami ng utol kong si Pot kasi lahat ng bata sa iskul ay meron nito. Nilagyan namin ng bulak at baby powder 'yung Kodak film canister na nagsilbing bahay nila.

"Uy, ang laki na ng isa mong kisses. Manganganak na yan.", pa-cute na sabi ng bebot kong klasmeyt.

"Oo nga ano, ang laki-laki na!", mas pa-cute kong sagot kahit alam kong 'di naman talaga lumaki. Mas lumalaki pa ang pututoy ko eh!

Manganganak na ang misis ko sa susunod na taon pero dalawampung piraso pa rin ang kisses namin ni utol. Kung buhay pa ang guro ko sa nursery, baka napingot niya ako nang wala sa oras. Living things and non-living things...

Ultimate Popper
Sino ba naman ang makakalimot kay Ultimate Warrior ng World Wrestling Federation? Naadik ang mga Pinoy sa Wrestling noong kapanahunan ko. Palibhasa ay sa Channel 13 lang napapanood ang WWF, hindi malaman ng mga kelots kung namatay nga si Warrior sa laban nila ni Andre the Giant. Sinubukan daw niyang buhatin ang higante para i-powerslam kaya pumutok ang mga ugat niya sa mga braso.

Isang bersyon pa nito ay ang patawa na nagbuhat daw si Warrior ng barbel. Hinubaran siya ni Hulk Hogan kaya hinabol niya ang kanyang trunks. Dedbol kaagad nang madaganan ang kanyang batok ng mabigat na binubuhat.

Manananggal Terrorizes Manila

Isa sa mga pinaka-klasik na kuwento ng dekada. Nabulabog kami sa Mangoville noong sumiklab ang balita na may manananggal daw sa siyudad. Eh nagkataong maraming buntis doon sa lugar namin kaya lahat ng bahay, may nakasabit na bawang para hindi makalapit yung tik-tik na partner in crime ng halimaw. Kada gabi, may mga tomador at adiktus na rumoronda sa lugar namin para magbantay laban sa mga kampon ng kadiliman.

Snake Charm

Kahit na anong kuwento ang kumalat tungkol sa Galleria, hindi ako naapektuhan dahil wala namang taong-ahas sa arcades na kakain sa amin ng tropa ko. Ayon sa kuwento, may kambal daw si Robina at ito ay isang nilalang na kalahating tao at kalahating ahas. Ito daw ang suwerte ng pamilya nila kaya hindi ito pinapabayaan. Sa basement daw ng Robinson's ito nakakulong at ang kinakain ay panay mga magagandang kababaihanna nagsusukat sa mga dressing rooms na may trap doors. Kapag trip niya ang bebot na nakikita sa kanyang monitor, isang pindot lang ng buton ay napupunta na ang biktima sa kanyang lungga. Parang may kumalat na tsismis tungkol kay Alice Dixson na nagkukuwento ng kanyang karanasan doon sa dressing room at naghayag na nakakapit lang daw si a kaya nakatakas. Mas humaba aung kuwento nang may kumalat na kuwentong binigyan siya ng mga may-ari ng malls ng isang blank check para lang manahimik.

AIDS to the World
May grupo yata talagang nagpapatakbo ng urban legends. Halos magkasabay na kumalat ang kuwento tungkol sa kambal ni Robina at kuwento tungkol sa isang taong may sakit na AIDS na gumagala sa  Megamall para manghawa. Madalas daw itong mambiktima sa mga elevators gamit ang seringhilya na naglalaman ng kanyang maruming dugo. Kung ikaw ang suwerteng matuturukan ng karayom, jackpot ka sa sakit na noon ay talagang kinakatakutan.


Marked Money
Dawit ulit ang pangalan ng mall ng aking Tito Henry. Kumalat ang balita na mas malaki daw ang halaga ng mga perang may commemorative seal ng sentenaryo. Binibili daw ng SM ang mga pera ng doble o triple ng halaga nito. Marami ang umasa at naniwala kaya kahit wala nang panggastos ay pilit paring hindi winawaldas ang mga markadong papel.

Napakarami pang mga kuwentong puwedeng isali sa "That's Incredible!" ang Dekada NoBenta. Kasama rin dito ang balitang mga bading daw talaga ang Spice Girls at racist si Tommy Hilfiger dahil ayaw niya ng Asian models.

Sa lahat ng mga kuwentong hindi kapani-paniwala, isa lang ang aking pinaniwalaan - ang "Year of the Beast". Ayon sa mga pilosopo Tasyo at mga tsismoso sa barberya, may masama raw na mangyayari tuwing ito ay magaganap. Ang unang pagkakataon ay noong 666 A.D. at ang pangalawa ay noong 1332 A.D.

Ang sunod na taon ay 1998.

Tama sila sa hula. Naging presidente si Erap!