Palibhasa Gwapings

Kapag tinitingnan ko ang photos ng kambal naming mga anak na sina Les Paul and Lei Xander, hindi mawala sa isip ko na balang araw ay maraming silang paiiyaking babae. Paano ba naman ay nagmana sila sa kanilang napakagandang Supernanay kaya sila lumalaking mga gwapings!

Not so long ago, siyempre noong Dekada Nobenta (1991 to be exact), may tatlong teenagers ang sumulpot sa Palibhasa Lalaki na isang sikat na palabas sa Dos. Ang tatlong bugoy ay walang iba kundi sila Jomari Yllana, Mark Anthony Fernandez, at Eric Fructuoso. Sila ay na-discover ng yumaong Douglas Quijano na kilalang talent manager na nagpasikat rin sa mga artistang tulad nila Richard Gomez, Joey Maquez, at Janice De Belen.

Maganda ang naging pagtanggap sa kanila ng masa, lalo na ng mga kababaihan, kaya nakilala sila bilang isang trio ng mga poging binatilyo. Nabigyan sila ng bansag na THE GUWAPINGS dahil sa angkin nilang kaguwapuhan sa harap ng camera. Lahat yata ng showbis magazines at entertainment section ng mga dyaryo noon ay sila ang story dahil halos lahat ng mga Pinoy ay gustong malaman ang kani-kanilang buhay. Saksi ako sa kanilang pagsikat dahil nakita ko kung paano kolektahin ng mga pinsan kong sila Bambie, Ate Irene at Ate Yeye ang mga babasahin na sila ang laman. Nalalaglag ang mga panty nila kapag nakikita nila ang tatlo! Nakikipag-away pa nga sila sa aming mag-pipinsang lalaki kapag nililipat ang channel ng teevee kapag ang trio ang ipinapalabas.

Patok na patok sila hindi lang sa mga chikas kundi pati na rin sa mga kelots. Natatandaan ko noong nasa high school pa ako ay binasagang "The Kutings" ng mga klasmeyts namin ang grupo namin nila Noel Tugnao at Ryan Clemente dahil feeling guwapings kami at mga bansot during those times! Sa tingin ko ay hindi naman ako nag-trying hard dahil alam ko namang kamukha ko talaga si Mark noong kabataan ko. May mga litrato pa nga akong ginagaya ko ang mga posing niya. Peyborit ko ang isang picture ko na may suot akong sunglasses na kahawig ng sa kanya. Sayang at ipinanakot ni erpats sa daga kaya hindi na ako nagkaroon ng chance na ipakita sa inyo. Kahit na walang nagsabi na kamukha ko siya eh marami namang nagtanong kung saan ko nabili ang shades na kahawig na kahawig ng gamit ni idol.

Naging fanatic din ako ng Bench dahil sa kanilang tatlo. Pinagsisikapan ko dating mag-ipon ng pera para lang makabili ng damit na ini-endorse nila. Kahit na atakihin na ako ng ulcer basta't masuot ko lang ang damit nila. Feeling ko kasi ay guwapo na rin ako kapag 'yun ang suot ko! Noong JS Prom namin ay ginaya ko pa ang style nila na nakita ko sa isang kalendaryo sa bahay ng lola ko. Nakahiram ako ng mga medyo katulad na damit at ramdam kong  bagay sa akin 'yung suot ko dahil parang may "moment of silence" nang dumating ako sa venue ng prom namin. Kitang-kita kong nagbubulungan ang mga ka-batch ko at biglang sabay-sabay na tatawa!

Sigurado rin akong naaalala ng bawat batang nineties ang pinausong band-aid na may design na Mickey Mouse. Lahat yata ng kabataan noon ay naglalagay nito sa braso kahit na walang sugat basta masabi lang na cool sila. Hindi ko sure kung sino sa kanilang tatlo ang unang nagpakita nito sa teevee pero parang si Jomari yata ang nagdala ng ganitong trademark.

Nabigyan ang tatlo ng sarili nilang show noong 1992 entitled "Gwapings: Live" na ipinalabas sa GMA-7. Inaabanagan ito ng mga kabataan sa teevee at dinudumog din sa studio ng Kapuso na noo'y Rainbow Netwok pa ang tawag.

Hindi lang sila sa babasahin teevee namayagpag kundi maging sa movies din. On October 8, 1992, ipinalabas ang "Guwapings: The First Adventure". Ito ang kanilang first major film na written and directed by Jose Javier Reyes. Ang pinaghalong comedy, adventure, at horror  na ito ay walang kuwentang teen movie pero pumatok sa takilya at pinagkakitaan ng producer. Nagkaroon pa nga ito ng sequel after a year, ang "Guwapings Dos".

Sa gitna ng kasikatan ay napagpasyahan ni Tito Dougs na magdagdag ng isa panghmiyembro ng Gwapings. Nagulat ang madlang noypi nang isama sa kanilang grupo ang bagitong si Jao Mapa. Mixed ang reaction -  maraming violent pero meron din namang natuwa. Ang malungkot lang, sa time ng pagsali niya ay nababalot na ng controversy ang original members tungkol sa kanilang mga love life. 

Nang magsimula na ang tatlo na magkaroon ng mga individual projects, si Mark ang pinakasumikat sa kanila dahil sa tambalan niya kay Claudine Barreto. Pero bigla rin siyang nawala nang medyo nalulong sa masamang bisyo. Sa pagkawala niya ay nawala rin si Eric sa eksena habang si Jao ay nagtuloy nalang sa pag-aaral sa college. Naiwan si Jomari na mas nanatiling matagal sa showbiz sa kanilang apat.

Ang legacy ng tatlo ay hindi na yata mapapantayan. Maraming grupo ng bagets ang ipinakilala sa masa matapos silang mawala - sumikat ang mga bago pero hindi tumagal tulad ng sa tatlo / apat.

Buti nalang hindi ako sumikat. At least hindi naman ako nalaos.